ਸੜਕ ਹਾਦਸੇ ’ਚ ਲੈਫਟੀਨੈਂਟ ਦੀ ਮੌ+ਤ, ਕੈਪਟਨ ਗੰਭੀਰ ਜ਼ਖ਼ਮੀ

17/12/2023

ਸ਼ੁੱਕਰਵਾਰ ਦੇਰ ਰਾਤ ਤਕਰੀਬਨ ਢਾਈ ਵਜੇ ਜਲੰਧਰ ਦੇ ਥਾਣਾ ਪਤਾਰਾ ਅਧੀਨ ਆਉਂਦੇ ਪਿੰਡ ਨਰੰਗਪੁਰ ਨੇੜੇ ਇਕ ਕਾਰ ਹਾਦਸੇ ਵਿਚ ਸੈਨਾ ਦੇ 24 ਸਾਲਾ ਲੈਫਟੀਨੈਂਟ ਲਕਸ਼ਿਤ ਦੀ ਮੌਤ ਹੋ ਗਈ ਜਦਕਿ ਉਸ ਦੇ ਨਾਲ ਮੌਜੂਦ ਕੈਪਟਨ ਯੁਵਰਾਜ ਗੰਭੀਰ ਜ਼ਖ਼ਮੀ ਹੋ ਗਿਆ ਜਿਸ ਨੂੰ ਇਲਾਜ ਲਈ ਮਿਲਟਰੀ ਹਸਪਾਤਲ ਦਾਖਲ ਕਰਵਾਇਆ ਗਿਆ ਹੈ।

ਥਾਣਾ ਪਤਾਰਾ ਦੇ ਏਐੱਸਆਈ ਜੀਵਨ ਸ਼ਰਮਾ ਮੁਤਾਬਿਕ ਮਿ੍ਰਤਕ ਲੈਫਟੀਮੈਂਟ ਅਕਸ਼ਿਤ ਕੁਮਾਰ ਹਰਿਆਣਾ ਦੇ ਹਿਸਾਰ ਦਾ ਰਹਿਣ ਵਾਲਾ ਸੀ ਤੇ ਜਲੰਧਰ ਕੈਂਟ ਸਥਿਤ ਸਿੱਖ ਰੈਜੀਮੈਂਟ ਵਿਚ ਤਾਇਨਾਤ ਸੀ। ਉਸ ਦੇ ਨਾਲ ਗੰਭੀਰ ਜ਼ਖਮੀ ਹੋਏ ਕੈਪਟਨ ਯੁਵਰਾਜ ਪੁਮੂਲ ਰਾਜਸਥਾਨ ਦੇ ਨਾਗੋਰ ਦਾ ਰਹਿਣ ਵਾਲਾ ਹੈ।

ਸ਼ੁੱਕਰਵਾਰ ਦੇਰ ਰਾਤ ਦੋਵੇਂ ਕਾਰ ’ਚ ਆਦਮਪੁਰ ਤੋਂ ਜਲੰਧਰ ਕੈਂਟ ਆ ਰਹੇ ਸਨ। ਪਿੰਡ ਨਰੰਗਪੁਰ ਨੇੜੇ ਕਾਰ ਬੇਕਾਬੂ ਹੋ ਕੇ ਪਲਟ ਗਈ ਤੇ ਦੋਵੇਂ ਗੰਭੀਰ ਜ਼ਖਮੀ ਹੋ ਗਏ। ਇਲਾਜ ਲਈ ਦੋਵਾਂ ਨੂੰ ਪਹਿਲਾਂ ਰਾਮਾ ਮੰਡੀ ਸਥਿਤ ਜੌਹਲ ਹਸਪਤਾਲ ਲਿਆਂਦਾ ਗਿਆ ਜਿਥੇ ਇਲਾਜ ਦੌਰਾਨ ਲੈਫਟੀਨੈਂਟ ਅਕਸ਼ਿਤ ਦੀ ਮੌਤ ਹੋ ਗਈ ਤੇ ਗੰਭੀਰ ਜ਼ਖਮੀ ਕੈਪਟਨ ਯੁਵਰਾਜ ਨੂੰ ਕੈਂਟ ਦੇ ਮਿਲਟਰੀ ਹਸਪਤਾਲ ਭੇਜ ਦਿੱਤਾ ਗਿਆ ਜਿਥੇ ਉਸ ਦਾ ਇਲਾਜ ਚੱਲ ਰਿਹਾ ਹੈ। ਮਿ੍ਰਤਕ ਲੈਫਟੀਨੈਂਟ ਦੀ ਲਾਸ਼ ਪੋਸਟਮਾਰਟਮ ਦੇ ਬਾਅਦ ਉਸ ਦੀ ਰੈਜੀਮੈਂਟ ਦੇ ਅਧਿਕਾਰੀਆਂ ਹਵਾਲੇ ਕਰ ਦਿੱਤੀ ਗਈ ਹੈ।