ਲੁਧਿਆਣਾ 'ਚ ਵੱਡੀ ਵਾਰਦਾਤ ! ਵੱਡੇ ਭਰਾ ਨੂੰ ਬਚਾਉਣ ਗਏ ਛੋਟੇ ਭਰਾ ਦੀ ਕੀਤੀ ਹੱਤਿਆ

26/12/2023

ਢੰਡਾਰੀ ਖੁਰਦ ਦੁਰਗਾ ਕਾਲੋਨੀ ’ਚ ਸੋਮਵਾਰ ਦੇਰ ਸ਼ਾਮ ਝਗੜੇ ਦੌਰਾਨ ਵੱਡੇ ਭਰਾ ਦਾ ਬਚਾਅ ਕਰਨ ਗਏ ਨੌਜਵਾਨ ’ਤੇ ਤਿੰਨ ਲੋਕਾਂ ਨੇ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ। ਲਹੂ-ਲੂਹਾਨ ਹਾਲਤ ’ਚ ਗੁਰਪ੍ਰੀਤ ਸਿੰਘ ਨੂੰ ਸਿਵਲ ਹਸਪਤਾਲ ਲਿਜਾਇਆ ਗਿਆ, ਜਿਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਮ੍ਰਿਤਕ ਦੇ ਭਰਾ ਅਮਨਪ੍ਰੀਤ ਸਿੰਘ ਨੇ ਦੱਸਿਆ ਕਿ ਉਹ ਘਰ ਦੇ ਨੇੜੇ ਹੀ ਜੂਸ ਪੀਣ ਗਿਆ ਸੀ। ਇਸ ਦੌਰਾਨ ਇਕ ਐਕਟਿਵਾ ’ਤੇ ਤਿੰਨ ਲੋਕ ਪਹੁੰਚੇ ਤੇ ਐਕਟਿਵਾ ਸੰਤੁਲਨ ਵਿਗੜਨ ਕਾਰਨ ਡਿੱਗ ਪਈ। ਇਸ ਦੌਰਾਨ ਉਥੇ ਖੜ੍ਹਾ ਇਕ ਹੋਰ ਵਿਅਕਤੀ ਹੱਸਣ ਲੱਗਾ। ਇਸ ਦੌਰਾਨ ਉਕਤ ਤਿੰਨੋਂ ਜਣਿਆਂ ਨੇ ਉਸ ਨੂੰ ਉਕਤ ਵਿਅਕਤੀ ਦਾ ਸਾਥੀ ਸਮਝ ਲਿਆ ਤੇ ਬਹਿਸ ਕਰਨ ਲੱਗ ਪਏ। ਇਸ ਦੌਰਾਨ ਉਸ ਨਾਲ ਬੱਚਾ ਸੀ। ਉਹ ਘਬਰਾ ਕੇ ਆਪਣੀ ਮਾਂ ਨੂੰ ਬੁਲਾਉਣ ਚਲਾ ਗਿਆ। ਪਤਨੀ ਦੇ ਨਾਲ ਉਸ ਦਾ ਭਰਾ ਗੁਰਪ੍ਰੀਤ ਵੀ ਉਥੇ ਆ ਗਿਆ।

ਗੁਰਪ੍ਰੀਤ ਨੇ ਉਸ ਦਾ ਬਚਾਅ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਕਤ ਲੋਕਾਂ ਨੇ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ। ਉਸ ਦਾ ਭਰਾ ਗੰਭੀਰ ਫੱਟੜ ਹੋ ਕੇ ਡਿੱਗ ਪਿਆ। ਉਹ ਭਰਾ ਨੂੰ ਸੰਭਾਲਣ ਲੱਗਾ ਪਿਆ ਤੇ ਇੰਨੇ ਨੂੰ ਉਕਤ ਮੁਲਜ਼ਮ ਮੌਕੇ ਤੋਂ ਫ਼ਰਾਰ ਹੋ ਗਏ। ਲੋਕਾਂ ਦੀ ਮਦਦ ਨਾਲ ਉਹ ਭਰਾ ਨੂੰ ਸਿਵਲ ਹਸਪਤਾਲ ਲੈ ਕੇ ਪੁੱਜਾ, ਜਿਥੇ ਉਸ ਨੇ ਦਮ ਤੋੜ ਦਿੱਤਾ। ਘਟਨਾ ਦੀ ਜਾਣਕਾਰੀ ਮਿਲਣ ’ਤੇ ਪੁਲਿਸ ਮੌਕੇ ’ਤੇ ਪੁੱਜੀ ਤੇ ਪੁੱਛਗਿੱਛ ਸ਼ੁਰੂ ਕੀਤੀ।