ਆਪ ਆਗੂ ਨੇ ਸਟਿੰਗ ਆਪਰੇਸ਼ਨ ਰਾਹੀਂ ਸਤਲੁਜ ਦਰਿਆ 'ਚ ਨਜਾਇਜ਼ ਮਾਈਨਿੰਗ ਦਾ ਕੀਤਾ ਪਰਦਾਫਾਸ਼

29/02/2024

ਸਤਲੁਜ ਦਰਿਆ ਚ ਰੇਤੇ ਦੀ ਨਜਾਇਜ਼ ਮਾਈਨਿੰਗ ਦਾ ਸਟਿੰਗ ਆਪਰੇਸ਼ਨ ਰਾਹੀਂ ਆਪ ਆਗੂ ਨੇ ਪਰਦਾਫਾਸ਼ ਕੀਤਾ। ਆਪ ਆਗੂ ਨੇ ਖੁਦ ਪਿੰਡ ਵਾਸੀਆਂ ਨਾਲ ਕਈ ਘੰਟੇ ਨਜਾਇਜ਼ ਮਾਈਨਿੰਗ ਦੇ ਇਸ ਗੋਰਖ ਧੰਦੇ ਨੂੰ ਪਰਦਾ ਫਾਸ ਕਰਨ ਲਈ ਜੱਦੋ ਜਹਿਦ ਕੀਤੀ। ਸਟਿੰਗ ਆਪਰੇਸ਼ਨ ਦੌਰਾਨ ਸਤਲੁਜ ਦਰਿਆ ਚ ਪਾਬੰਦੀ ਦੇ ਬਾਵਜੂਦ ਧੜੱਲੇ ਨਾਲ ਪੋਕ ਲਾਈਨ ਮਸ਼ੀਨਾਂ ਰਾਹੀਂ ਰੇਤਾ ਕੱਢਣ ਦੇ ਸਾਰੇ ਮਾਮਲੇ ਨੂੰ ਕੈਦ ਕਰਨ ਤੋਂ ਬਾਅਦ ਮੌਕੇ ਤੇ ਪੁਲਿਸ ਸੱਦੀ ਗਈ। ਪੁਲਿਸ ਅਤੇ ਮਾਈਨਿੰਗ ਵਿਭਾਗ ਦੇ ਅਧਿਕਾਰੀਆਂ ਨੇ ਮੁੱਲਾਪੁਰ ਦਾਖਾ ਤੋਂ ਆਮ ਆਦਮੀ ਪਾਰਟੀ ਦੇ ਹਲਕਾ ਇੰਚਾਰਜ ਡਾਕਟਰ ਕੇ ਐਨਐਸ ਕੰਗ ਦੀ ਸੂਚਨਾ ਤੇ ਪਿੰਡ ਅਕੂਵਾਲ ਪਹੁੰਚੇ ਜਿੱਥੇ ਉਹਨਾਂ ਸਤਲੁਜ ਦਰਿਆ ਵਿੱਚ ਰੇਤਾ ਕੱਢ ਰਹੀਆਂ ਦੋ ਪੋਕ ਲਾਈਨ ਮਸ਼ੀਨਾਂ ਨੂੰ ਉਹਨਾਂ ਦੇ ਚਾਲਕਾਂ ਸਮੇਤ ਕਾਬੂ ਕੀਤਾ ਜਦਕਿ ਇਸ ਛਾਪਾਮਾਰੀ ਦੌਰਾਨ ਤਿੰਨ ਪੋਕ ਲਾਈਨਾਂ ਜੇਸੀਬੀ ਮਸ਼ੀਨਾਂ ਚਾਲਕ ਭਜਾ ਕੇ ਲੈ ਕੇ ਜਾਣ ਵਿੱਚ ਕਾਮਯਾਬ ਰਹੇ। ਇਸ ਮਾਮਲੇ ਵਿੱਚ ਥਾਣਾ ਸਿੱਧਵਾਂ ਬੇਟ ਦੀ ਪੁਲਿਸ ਨੇ ਪੋਕ ਲਾਈਨ ਮਸ਼ੀਨਾਂ ਦੇ ਦੋਵੇਂ ਚਾਲਕਾਂ ਨੂੰ ਗਿਰਫਤਾਰ ਕਰਕੇ ਉਹਨਾਂ ਖਿਲਾਫ ਮੁਕਦਮਾ ਦਰਜ ਕਰ ਲਿਆ।